લોકશાહી

આપણને લોકશાહી જ ફાવે.
આમ આપણે પેટાસરમુખત્યારો જીરવી લઈએ,
પણ ફાવે તો તોય લોકશાહી જ.
સત્યના ભોગે આપણે વાણી સ્વાતંત્ર્ય માણીએ,
કારણ શું કે લોકશાહી હોય એટલે કાંઈ લોકોની લાગણીઓ થોડી દુભાવાય ?
એટલે પછી ક્યારેક સત્ય,નીતિમત્તા આવું બધું જતું કરવું ય પડે !
ગુનેગારો અને આતંકવાદીઓ માટે પાણીની જેમ પૈસા વહાવતો દેશ લોકશાહી માટે આટલી કિંમત તો ચૂકવી જ શકે ને !?
એક ખાલી ધર્મ બાકાત રહે લોકશાહીમાંથી...
ધર્મમાં લોકશાહી ના જ હોય
એમાં કોઈ ગમે એમ બોલી,પહેરી કે વર્તી ના શકે (કોઈને નડતું ના હોય તો પણ).
એમ તો વસ્તીગણતરીમાં ય દેશના કેટલાય જીવતા જાગતા લોકો બાકાત રહી જ જાય છે ને !
તો ય આપણે ગણાઈ જઈએ એટલે આપણને સંતોષ નથી થઈ જતો ?
લોકશાહીમાંથી બાકાત રહેલો ધર્મ અને વસ્તીગણતરીમાંથી બાકાત રહેલા લોકોની આગવી લોકશાહી કે સરમુખત્યારશાહી હોય છે.
એનાથી આપણને શું ફેર પડે ?
આપણે તો આ લોકશાહીમાં જ માનીએ, જેમાં બધા જીવે છે.
બધા માને એવું માનવા માટે જ તો લોકશાહી છે,
એમાં આપણે ક્યાં પાવલોવ અને નિત્શે એ બધાને વચ્ચે લાવવા !
આપણને તો લોકશાહી ફાવે જ છે, પછી શું કામ ઘેટાંની કે કુતરાઓની સાયકોલોજી સમજવી !?
મગજ ના વાપરવું પડે એ ખાતર પણ આપણને તો લોકશાહી જ ફાવે !